İsraildən yeni hücum iddiası! Dəməşq ətrafındakı nöqtələr hədəfə alınıb

İsrailin Suriyanın paytaxtı Dəməşq ətrafındakı bəzi hərbi nöqtələrə hava hücumu təşkil etdiyi iddia edilib.

Sitat.info xəbər verir ki, Suriya xəbər agentliyi SANA-nın hərbi mənbələrə istinadən verdiyi xəbərdə, İsrail qüvvələrinin yerli vaxtla saat 02:20-də Dəməşq ətrafındakı bəzi hərbi məntəqələrin Colan təpələrindən hava hücumu ilə hədəf alındığı iddia edilib.

Xəbərdə deyilir: "Havadan müdafiə sistemlərimiz düşmən raketlərinə qarşı duraraq bəzilərini vurub. 4 əsgər şəhid olub, 4 əsgər yaralanıb". 

Məlumdur ki, Dəməşqin ətrafında Livan Hizbullahının ünsürləri ilə yanaşı, Suriya ordusu və İranın dəstəklədiyi terrorçu qruplaşmalar da var.

İsrail vətəndaş müharibəsinin başladığı 2011-ci ildən bəri Suriyada zaman-zaman İranın dəstəklədiyi qruplara və Suriya ordusuna aid hərbi məntəqələrə hücumlar təşkil edir.

Seymur Bənnayev

Sitat.info