"Uşaq futbolunun inkişafı məktəbdən və məhəllədən başlayır"- Ceyhun Sultanov

Futbol təkcə bir oyun deyil, uşaqlar və yeniyetmələr üçün həm fiziki inkişafın, həm də sosial bacarıqların formalaşmasında mühüm vasitədir. Azərbaycanda da futbol sevgisi erkən yaşlardan başlayır. Bəs, bu sevginin sağlam şəkildə formalaşmasında hansı ünsürlər əsasdır? Bu sahədə hansı addımlar atılmalıdır?

Sitat.info-ya açıqlamasında bu sualı cavablandıran keçmiş futbol funksioneri Ceyhun Sultanov bildirib ki, bu sahənin inkişafına məktəblərdən başlamaq lazımdır: "İlk olaraq uşağın özünün istəyi olmalıdır. Məcburən hansısa uşağı bir sahəyə, yaxud futbola yönəltsən və uşağın istəyi olmazsa, istər valideyn tərəfindən, istər məktəb tərəfindən buna təkan vermək heç vaxt alınmıyacaq. Çünki bu birinci olaraq uşağın özündən asılıdır. Ondan sonra isə bu dəstəkləri etməyə ehtiyac olacaq. Əfsuslar olsun ki, məktəblərdə bu gün idmanla bağlı, futbolla bağlı elə bir aktivlik yoxdur. Çünki biz oynadığımız zamanlarda həmişə məktəblər arası çempionatlar keçirilirdi. Daha yaxşı uşaqları göz önünə çıxarmaq mümkün olurdu. Əfsuslar olsun ki,  bu günlərdə məktəblərdə idmana çox az vaxt ayrılır. Elə məktəblər var ki, heç idman zalı belə yoxdur. Ona görə də Təhsil Nazirliyi  bunun üzərində çalışsa daha yaxşı olar. Buna diqqət ayırmaq lazımdır. Çünki bütün futbolçular məktəbdən çıxır. Ona görə də məktəbdə olan idman zallarında idman dərslərinə çox vaxt ayırmaq lazımdır".

C.Sultanov bildirib ki, bu məsələdə uşağın istəyi  və həvəsi önəmlidir: "Bilirsiniz, uşağın idmana gətirilməsində ailənin təsiri hardasa var. Bir tərəfdən də düşünməliyik ki, uşağın hansı idman növünə istəyi var. Biz bu gün hansısa bir şahmat oynayan uşağı gətirib futbol oynada bilmərik. Ona görə valideyn uşağın istəyinə uyğun olaraq onu yönəltməlidir və ona dəstək verməlidir".

Ekspertin sözlərinə görə, uşaqların rahat oynaması üçün yaşayış yerlərinin həyətlərində boş ərazi tapmaq çətindir: "Uşaq futboluna marağın artırılması ilk olaraq həyətdən başlayır. Yaşadıqları ərazilərdə meydançalar olmalıdır, məhəllədə futbol oynamalıdırlar. Bununla yanaşı idman dərslərinə çox diqqət ayırılmalıdır. Bu hamısı zəncirvaridir. Bunları etməyənə qədər biz heç bir uşağı götürüb yetişdirə bilmərik. Uşağın futbol oynamağı bələkdən olmur ki... Uşaq böyüyə-böyüyə futbol oynamalıdır. Əgər bu gün küçələrdə meydançalar yoxdursa, deməli bunu artırmalıyıq. Əvvəllərlə indikinin arasında çox böyük fərq var. Əvvəllər hamı meydançalarda oynayırdı, bu gün isə o yoxdur. Ona görə bütün məhəllələrdə meydançalar salınmalıdır. İdman dərslərinə fikir verilməlidir. Məktəblərarası çempionatlar olmalıdır. Bunlar hamısı önəm daşıyır".

Əlisahib İbrahimli,

Sitat.info